Justizia administratiboak La Négresse izena desagertzea agindu zuen Biarritzen baina ofizialki oraindik onartua dela salatu du Memoires et Partages izeneko elkarteak. Serge Blanco alkate berriari idatzi dio, erabakia behingoz onar dezan, bidean duten helegitea bertan behera utziz.

Iazko urtarrilaren 16arekin gauzatu zuen Bordeleko administrazio dei auzitegiak Biarritzeko auzoaren izenaren legezkotasuna erabakitzeko saioa. Txostengile publikoak tokiari La Negresse izena ematea ahalbidetzen duten Herriko Etxearen erabakien indargabetzea eskatu zuen.

Epaileek jakinarazi zuten erabakian, auzoaren izenari «kutsu arrazista, koloniala eta sexista» egotzi zion elkarteak. Helegitea ontzat emanez, Bordeleko auzitegiak Herriko Etxeari hiru hilabeteko epea eman dio auzoari izena aldatzeko.

Ika-mika luzea eta eztabaida garratzak eragin ditu azken hilabeteetan lehenagotik euskaraz Harausta izenez ezagutzen zen auzoari La Negresse izena emateko erabakiak.

Afera bukatutzat ematen zen baina ez da honela gertatu. Uztailaren 27an, Memoria eta Partages elkarteak Biarritzeko Hiriari dei egin dio erabakia onar dezan. Izan ere, Udal berriak La Négresse izena mantendu du.

Karfa Diallo elkartearen sortzailearentzat, erabaki horrek ez du errespetatzen Bordeleko jurisdikzioak 2025eko otsailaren 6an emandako epaia. La Négresse izena desagerrarazi behar zutela agindu zuen, bai kaletik, bai auzotik, terminologia horren izaera iraingarria zela gogoratuz.

Helegitea abian

2025eko maiatzean, horren ondorioz, Maider Arosteguy orduko alkateak erabakia beteko zutela iragarri zuen. Hilabete geroago, La Négresse kaleko errotulua aldatu egin zuten, eta Allégresse kalea izendatu. Vinci kontzesionarioak, 2025eko abenduan, A63 autobideko ordainlekuko panelen izenak ere desagerrarazi zituen.

Auzoan La Négresse horren beste aipamen batzuk badira oraindik. Gimnasio batek eta ile-apaindegi batek, bereziki, zorigaiztoko izena gordetzen dute. La Négresseko Cien Docks denda famatua, berriz, uda bukaeran itxi behar dute.

Memoires et Partages elkarteak, La Négresse izena Biarritzeko eremu publikotik erabat desagertzeko borrokan ari denak, Biarritzeko Udalaren jarrera deitoratzen du. Bere bozeramaileak adierazi duenez, udal gobernu berriari eskua luzatu dio eta Estatu Kontseiluaren aurrean jarritako errekurtsoa bertan behera uztea eskatu dio, justizia, memoria eta diru publikoaren erabilerari zor zaion errespetua argudiatuz. Demokrazia batean ezin direla erabaki judizialak honela borrokatu nabarmendu du Karfa Diallok.

Elkarteak bi hilabeteko epea eman dio Udalari helegitea bertan behera uzteko. Epe hori gaindituta, auzi-errekurtso baliagarri guztiak aurkeztu nahi dituela iragarri du.

Biarritzeko Udalak onartu du pasa den ostegunean, abuztuak 6an, izan zuela gutunaren berri. Serge Blanco auzapezak balorazioa egingo omen du hurrengo egunetan.