Gasteizko Mugimendu Transbollomarikak ekainaren 28an egingo duen mobilizazioan autoritarismo arrazistaren aurkako mezua jarriko du erdigunean. Manifestazioa 12:00etan abiatuko da Andre Maria Zuriaren plazatik, eta hainbat eragile sozial, feministaren eta antirrazistaren babesarekin egingo dute.

NAIZ Irratian egindako elkarrizketan, Lumagorri elkarteko kide Amets Martinez de Hereditak azaldu du aurtengo mobilizazioak Palestinatik harago begiratu nahi duela, munduan herrien aurka gertatzen ari diren erasoak eta zapalkuntzak ere salatzeko. Haren hitzetan, LGTBIQ+ mugimendua «borroka anitzez osatutako kolektiboa» da, eta horregatik ezinbestekoa da ikuspegi intersekzionala lantzea.

Martinez de Hereditak nabarmendu du Ekainaren 28a ez dela soilik sexu eta genero askatasunaren aldeko eguna, baizik eta sistema patriarkal eta kapitalistaren aurkako aldarria egiteko unea ere badela. Azaldu du «zapalkuntzek elkar gurutzatzen» dutela, eta horien artean kokatu ditu arrazakeria, hizkuntza gutxituen aurkako oldarraldia, kapazitismoa eta LGTBI pertsonen aurkako gorroto diskurtsoak.

Horren harira, kezka agertu du azken hilabeteetan Araban zabaldutako mezu arrazista eta LGTBIfoboengatik: «faxismoak ez du bereizketarik egiten; Faxismoa ere gure kontra joaten da». Haren esanetan, «ultraeskuinak kolektibo zaurgarrien aurka jotzen du modu bateratuan», eta horregatik erantzunak ere bateratua izan behar du. «Gure borroka ere borroka antirrazista da», azpimarratu du.

Aliantzak eraikitzea «ezinbestekotzat» jo du faxismoaren gorakadari aurre egiteko. Azaldu du mobilizazioa sei eragilek antolatu dutela, baina elkarlana askoz zabalagoa dela, eta «fronte antifaxista ikuspegi feministatik eraiki» behar dela defendatu du.

Instituzioei ere interpelazioa egin die. Salatu du askotan Ekainaren 28aren inguruko adierazpen instituzionalak sinbolismo hutsean geratzen direla eta, egunaren biharamunean, LGTBI politikek lehentasuna galtzen dutela.

Memoria historikoaren garrantzia azpimarratu du. Stonewalleko matxinadaz gain, Euskal Herriko borrokaren erreferenteak ere gogora ekarri ditu, hala nola Francisen erailketa eta EHGAMen sorrera.

Manifestazioaren ostean, Gasteizko Alde Zaharrean Arraza Harro egitasmoaren barruan antolatutako jardueretan parte hartzeko deia ere egin dute antolatzaileek, aldarrikapena eta ospakizuna herri ekimenetik uztartuz.