Errefuxiatuen Munduko Eguna dela eta, Gobelako zelaian kirola, historia eta elkartasunak bat egin dute zapatu honetan. 2005ean UEFAko Eskualdeen Kopa irabazi zuten Euskal Selekzioko jokalariek eta CEAR Euskadiko errefuxiatu talde batek lagunarteko partidua jokatu dute. Horren aurretik argazkia atera dute Bizkaiko Foru Barriaren (1526-2026) 500. urteurrenaren oroitzapenezko kartelaren aurrean.

XVI. mendean osaturiko Foru Barriak bere garairako printzipio aurreratuak ezarten zituen, hala nola legearen aurreko berdintasuna, torturaren debekua eta askatasunaren bermea (habeas corpus). «Izan zirelako gara» lelopean, egungo sistema politikoaren eta bizikidetzaren oinarria dan ondarea aldarrikatu dute parte-hartzaileek.

Gobelako bizipen honekin futbolaren munduak bat egin du beste klub eta diziplina batzuekin, esaterako Bilbao Basketek, arraun mundua, Getxo Rugby Taldea edo Bidaideak saskibaloi egokituko klubak. Kirol-sarearen lankidetzaren bitartez lurraldeak duela bost mende herritarren askatasunak eta salbuespenak bermatu ebazan arauagaz daukan konpromisoa azpimarratzen du.

Kirol topaketaz gain, zabalkunderako ekimenak desberdinak ere ekarri dira gogora. Esaterako, 1526ko jatorrizko alea gordetzen duen Foru Liburutegiko erakusketa zientifikoa edo Gurutzetako metro geltokian eta Portugaleteko La Canilla pasealekuan dauden erakusketa ibiltariak. Ekitaldi honekin, Bizkaiak bere iragan juridikoa ospatu du zapatu honetan, harrerarekin eta giza eskubideei lotuta egun konpromisoa berretsi nahiko lukeelako.

Horrez gain, Bilboko Batzar Nagusien eraikina ere urdinez argitu da, Errefuxiatuen Munduko Eguna gogorarazteko.