Iazko urriaren 7an zazpi herritar auzipetu zituzten Baionako auzitegian, pertsona migranteak Ipar Euskal Herrira sartzen laguntzea leporatuta. Izan ere, 2024ko martxoaren 14an, 23. Korrikaren lehen egunean, herritar talde batek 36 etorkin Lapurdira sartzen lagundu zituen Irun eta Hendaia lotzen dituen Santiago zubian. Otsailaren 17an, auzitegiak zazpi ekintzaileak errugabe jo zituen.

Auzitegitik atera berria, auzipetu batek, Eñaut Aramendik, eskerrak emateko baliatu zituen bere lehen hitzak: batetik, abokatuei, «juridikoki egindako lan guztiagatik», eta bestetik, «azken bi urte hauetan mobilizatu diren milaka eta milaka pertsona» horiei.

lldo beretik, joan zen larunbatean Avenida oinezkoentzako zubian antolaturiko agerraldian J’accuse plataformako kideek ebazpen judiziala «bere burua akusatu zuten milaka pertsonaren konpromisoaren emaitza» izan zela nabarmendu zuten. Abokatuek eginiko lana, baina baita auzipetuek jasotako herritarren sostengua, ezkertu zituen plataformak.

Hala, plataformako kideek eskerrak eman zizkieten «ateak ireki dizkiguten pertsona eta erakunde guztiei, gure borrokaren aldeko lekukotasuna eman ahal izateko». Zehaztu zutenez, «tokiko militante, Udako Unibertsitate edo Europako Parlamentuan partekatu ditugun epaia, mahai-inguru edo mintzaldi bakoitzak gure borrokaren zilegitasuna indartu du».

Hori dela eta, auziaren benetako irabazleak ez direla izan desobedientzia zibileko ekintza hura burutu zuten militanteak soilik, «gizarte osoa» baizik, mahaigaineratu zuten.

Horma irudi bat, elkartasunaren lekuko

Bidasoa igaro nahian azken urtetan hil diren bederatzi herritar gogoan, beste behin ere elkartasuna «ez dela delitua, gure indarra baizik», aldarrikatu zuten plataformako ordezkariek.

Muga hitza frantsesez (Frontiere) idatzia du zubiaren buruan, Hendaia aldean, kokatzen den aduana zaharreko etxola ttipiak. Bertan, horma irudi bat utzi zuten agerraldiaren amaieran J’accuseko lagunek. Elkartasuna lehenetsiz, migrazio politikak aldatzeko exijentzia idatzita utzi zuten kideek.

«Ez ditugu ahazten migrazio politika hauen biktimak, bereziki polizia kontroletatik ihes egin nahian Bidasoan edo inguruetan bizia galdu dutenak. Hori guzia ez ahanzteko, hautatu dugu gaur lurraldeko biztanleei horma irudi hau eskaintzea», azaldu zuten plataformako kideek, Euskal Herria harrera herria izan dadin lanean segitzeko engaiamendua berretsiz.