Mugarik Gabeko Medikuen (MSF) ikerketa berri batek ondorioztatu duenez, GHF Gaza Humanitarian Foundation-ek elikagaiak banatzeko zentroak «hilketa orkestratuen eta deshumanizazioaren» gune bihurtu dira, eta, beraz, itxi egin beharko lirateke.

Atzo argitaratutako txostenaren arabera, MSFk salatu du Israelgo indar armatuak eta AEBko kontratista pribatuak, Israelen baimenarekin, «goseak dauden palestinarren aurkako indarkeria selektibo eta indiskriminatua» erabiltzen ari direla GHFren zentroetan, Gazako Zerrendan elikagaiak banatzean.

MSFren bi osasun-zentrotan Gazako hegoaldeko Al-Mawasi eta Khan Yunis-en jasotako pazienteen eta osasun-langileen datu medikoak eta testigantzak aztertuta ondorioztatu dute egoera larria dela.

«GHFren banaketa-puntuak, laguntza-leku izan beharrean, krudelkeriaren laborategi bihurtu dira. Honek amaiera izan behar du», adierazi du Raquel Ayora MSFko zuzendari nagusiak.

Txostenak dioenez, indarkeriaren biktimen artean adingabeek pisu handia dute. Izan ere, «gosete egoera orokortuaren testuinguruan, familia askotan gizonezkoak dira elikagai bila joateko gai diren kide bakarrak», azaldu du MSFk. Horrela, Ayorak honakoa deskribatzen du: «Janari bila zebiltzala bularrean tiro egindako haurrak, estanpazioetan zapaldutako edo itotako pertsonak, banaketa puntuetan balaz jositako jendetza».

Hori dela eta, MSFk GHFren banaketa-sistema bertan behera uzteko eskatu du, eta elikagaien banaketa Nazio Batuen Erakundearen (NBE) esku uzteko. Halaber, mundu osoko gobernuei bereziki Estatu Batuetakoari eskatu die GHF finantzatzeari utz diezaiotela.

PLANIFIKATUTAKO ERASOAK
MSFren arabera, Al Mawasiko kliniketan bala zauriengatik artatutakoen %11k buruan edo lepoan jaso zituzten tiroak, eta beste %19k bularrean, sabelean edo bizkarrean. Khan Yunisko pazienteen kasuan, zauri gehienak hanketan izan ziren.

«Lesioen patroiek eta eremu anatomiko jakinetan izandako tiroek nahita egindako erasoen zantzu argiak ematen dituzte, banaketa-lekuen barruan eta inguruan, ustekabeko edo bereizi gabeko suaren ordez», adierazi du MSFk.

«Janaria jasotzeko lekuak eskema hilgarri baten parte dira. Martxoaren 2tik aurrera, Israelgo agintariek Gazan ezarri zuten setio osoaren bidez gose-politika instituzionalizatu dute. Hori, abian duten kanpaina genozidaren atal bat da», gaineratu du erakundeak.