Gutxienez lau pertsona hil dira eta hogeita hamar baino gehiago erreskatatu behar izan dituzte Mantxako Kanalean, Ingalaterrako Kent konderritik gertu, Gobernu britainiarrak baieztatu duenez. Txalupa txiki batean zihoazen 30-50 migratzaile inguru eta kanala zeharkatzen ari zirela ontzia irauli egin da goizeko lehen orduan, erreskate lanetan aritu diren kideek tokiko hedabideei jakinarazi dietenez.

BBC katearen arabera, 43 pertsona salbatu dituzte eta horietatik 30 baino gehiago kanaleko uretatik atera dituzte zuzenean.

Migratzaileak erreskatatzeko operazio zabala jarri dute abian, Erresuma Batuko kostazainek, Itsas Armadak, mugetako polizia indarrek eta Kent konderriko Poliziak parte hartu dute, Itsas eta Kostazainen Agentziak zehaztu duenez.

Ubideko uretara, gainera, Dungeness, Hastings eta Ramsgate herrietako ontziak eta kostazainen zerbitzuko bi helikoptero joan dira.

Gaur goizean Mantxako Kanalean jazotako gertakari larriaren berri izan dut eta egunean naukate etengabe, agentziek erantzun eta gertaera guztiak premiaz artatzen dituzten bitartean», adierazi du Suella Braverman Barne ministroak Twitterren.

Rishi Sunak britainiar lehen ministroak asteartean Komunen Ganberan herrialde horretara legez kanpoko migrazioa eteteko plan berri bat iragarri eta biharamunean gertatu da ezbeharra. Neurri gehiago hartu dituzte, itsasoz;migratzaileen etorrera kopurua murrizteko.