TRIPOLI. Aita Mari erreskate itsasontziak 11 pertsona erreskatatu zituen hondoratzear zegoen txalupa batetik atzo goizaldean, Mediterraneo itsasoan. 05:00etan jaso zuten abisua, eta 06:00etan topatu zituzten, EITBk jakinarazi zuenez. Onik topatu zituzten ontzian zeuden migratzaileak. Abisu eman zieten haiekin batera beste ontzi batzuk ere abiatu direla Libiatik, eta oraindik haien bila dabiltzala jakinarazi zuten.

Ekainaren 6an abiatu zen Aita Mari Balearretatik Mediterraneo itsasora, eguraldi onarekin batera ugaritu egiten baitira Afrikatik irten ohi diren ontziak, sarri jendez gainezka eta baldintza kaskarretan. Haien erreskatean jarduten du euskal ontzi horrek.