Zabalgarbiko zabortegian atzo agertu zen gorpua 20 urteko migrante magrebtar batena da, eta Bizkaiko Aldundiaren tutoretzapean egon izan da, hainbat hedabidek aditzera eman dutenez. Azaldu dute gizonezkoak dokumentazioa zeramala gainean, eta horrela jakin ahal izan dutela bere identitatearen berri; hala ere, orandik Segurtasun Sailak ez du ezer baieztatu.

Hain zuzen, Ertzaintzak jakinarazi zuen atzo goizaldean, gizon baten hilotza azaldu zela Zabalgarbi errauste plantan (Alonsotegi, Bizkaia); zehazki, «hondakinak husteko eta tratatzeko prozesuan». Ertzaintzaren arabera, gorpuari orain arte ez diote «indarkeria zantzurik» antzeman. Litekeena da kontainer batera lotara sartzea, eta zabor kamioiren batek oharkabean harrapatzea; beste hainbat kasutan gertatu da hori Bizkaian azken urteotan.

Zabalgarbira zama hustera joandako kamioiekin lanean ari zirenetako batek deitu zuen Ertzaintzara gorpua ikusi duenean. Ertzaintza eta auzitegiko medikua joan ziren bertara, eta Bilboko Auzitegiko Patologia Zerbitzura eraman zuten gorpua, autopsia egitera.