Oiartzungo Udalak etorri-berrientzako Harrera Planaren aurkezpena egin zuen joan den asteartean, udaletxeko areto nagusian. Euskara eta Gizarte-Ongizate sailetatik bideratu den proiektua aurkezteaz gain, etorri-berrien inguruan sarea osatuko dela aipatu zen. “Herrian integrazioa erraztuko duten kolaboratzaile eta laguntzaileen sarea osatu nahi dugu”, argitu zuen aurkezpenean Ioritz Aizpuruk, Euskara saileko zinegotziak.

Proiektua aurkezteaz gain, etorri-berriei eskainiko zaien harrera saioan ikusiko den dvd-a erakutsi zen. «Etorri-berriei herriko berri emateko sortu da ikus-entzunezko material hau lau hizkuntzatan: euskaraz, gazteleraz, frantsesez eta ingelesez», azpimarratu zuen Aizpuruk.

Ikus-entzunezkoan Oiartzun herriaren inguruko aurkezpen orokorra egiten da, bertan dauden zerbitzuak aurkeztuz. Besteak beste, Oiartzungo Udala, Manuel lkeuona biblioteka, Muruetagoiena osasun etxea, Abaraxka ludoteka, Urmendi haur-eskola, ikastetxeak, HELTAk antolatutako tailerrak… erakusten dira, hainbat herritarren bitartez.

Azaroaren 17an lehen ongietorria

Aurkezpenean, lehen ongietorri saioa azaroaren 17an egingo dela adierazi zen. “Lehendabiziko saioa udal areto nagusian egingo dugu azaroaren hirugarren astean, arratsaldeko 19:00etan”, adierazi zuen Aizpuruk. “Saio hori prestatzen talde anitz bat ari da lanean”, zehaztu zuen. Eta eskertu zuen udalaren izenean egiten ari diren lana. "Hurrengo saioak, berriz, elkarteetan egin nahi ditugu, ongietorriaren gaia ez delako udalarena bakarrik, herriarena baizik».