Josu Bergarak Sestaoko alkate karguan jarraituko du. Ez du dimisiorik eman, eta bere alderdiak, EAJk, ez dio dimisiorik eskatu. Babestuta agertu zen atzo arratsaldean udaletxera, «delinkuentziaren inguruan Ertzaintzarekin eta bizilagunekin izandako bilerei buruzko» prentsaurrekora. Herritarrek babestuta, eta alderdiko zinegotziek babestuta. Etorkinen aurkako adierazpenak —atzo BERRIAk argitaratu zituen— «desegokiak» direla onartu eta barkamena eskatu zuen. Eta alkate jarraituko duela berretsi zuen: «Orain arte bezala Sestaoren alde lan egiten segitzeko konpromisoa hartzen dut».

Bergararen aurkako salaketa aurkeztu zuten atzo Sestaoko zortzi bizilagunek Barakaldoko Epaitegian. Prebarikazioa egotzi diote, etorkinak eta ijitoak erroldatzeari uko egin diolakoan, eta arrazakeriaren astungarria erantsi diote, higiezinen enpresa bateko jabeari egindako iruzkinak oinarri hartuta. Salaketa hori, baina, ez zuen aipatu Bergarak. Ezta dimisio hitza ere. Etorkinak eta ijitoak ez erroldatzea agindu izana ere ez zuen ukatu. Adierazpen bat irakurri besterik ez zuen egin, kazetarien galderak onartu gabe.

Txaloka jaso zuten alkatea dozenaka herritarrek, eta txaloka agurtu. «Herria zurekin dago!», esan zioten osoko bilkuren aretora sartu zirenek. Serio agertu zen Bergara. Minutu batzuk egin zituen isilik, leitzen hasi aurretik. «Argitara atera diren adierazpenak desegokiak direla onartzen dut. Barkamena eskatzen dut. Ezagutzen nautenek badakite zintzo mintzo naizela».

Grabazioa «editatua eta manipulatuta» dagoela gaineratu zuen ondoren. «Duela urtebete egin zen, eta orain atera da argitara, ulertzen ez ditudan arrazoiengatik». Azaldu zuen higiezinen enpresa batzuetako jabeekin izandako bileretako batean egin zela; etorkinak gainezka bizi diren etxe «gehiago» egotea saihestea zen bileron helburua, alkatearen arabera. «Etxe horietan familia osoak metatzen dira, higiene eta osasun baldintza onartezinetan. Kasu batzuetan, Sestaora etorkizun duina lantzera edo oparotasun orokorrean laguntzera etorri ordez, bizikidetza nahastera eta segurtasunik gabeko giro kezkagarria sortzera datozen pertsonak baliatzen dira etxe horiez».

«Delinkuentzia arazoa»

Hortik aurrera, herriko delinkuentzia hartu zuen ahotan. «Bizkaian delitu tasarik handienetakoa du Sestaok. Errealitate onartezina da, sestaoarrentzat eta udal gobernuarentzat». Erantsi zuen, hain justu, «gaizkileei eta gizalegerik gabekoei buruz» ari zela grabazioko adierazpenetan kaka hitza aipatu zuenean. «Ez naiz inola ere beste kolektibo mota batzuei buruz ari», esan zuen Bergarak, grabazioetan ijitoei eta atzerritarrei buruz mintzatu zela entzun daitekeen arren.

Sestaok «laguntza» behar duela uste du alkateak. «Ez immigrazioagatik, baizik eta delinkuentziaren kontra». Ildo horretan, atzo goizean bertan Ertzaintzako eta Sestaoko Udaltzaingoko zuzendaritzekin izandako batzarra aipatu zuen: «Gizalegerik ezaren eta delinkuentziaren aurka borrokatzeko lan estrategia bateratua ezartzeko bildu gara. Berriz diot: gizalegerik ezaren eta delinkuentziaren aurka, ez immigrazioaren aurka». Enpleguaz ere mintzatu zen, Sestaok baitu EAEko langabezia tasarik handiena: «Laguntza behar dugu enplegua sortzeko eta aurrera ateratzeko, eta, horretarako, babes instituzionala behar dugu».

«Orokortzea oker handia da», gaineratu zuen. Alkatearen hitzetan, «herri solidario eta multikulturala» da Sestao, pertsona asko «beso zabalik» hartu dituena, baina zehaztu zuen herri «multikulturala, langilea eta gizalegezkoa» nahi duela: «Ezin dugu onartu pertsona batzuk lapurtzera edota askatasuna, bakea eta bizikidetza murriztera etortzea».

«Ñabardurarik gabe», barkamena berriz eskatuz amaitu zuen agerraldia Bergarak. Eskaera bat ere egin zuen: «Demagogia errazetik, nire eta herriaren aurkako epaitze guztiz sumariorik ez dezatela egin, gu ezagutu gabe». Atzokoa «oso egun gogorra» izan zela eta ondoan egondako lankideei eta herritarrei eskerrak adierazi zizkien, euskaraz ahoskatutako hitz bakarretan.

Herritarren babesa

Esker on keinuak izan zituen, halaber, udaletxetik atera zenean. Zain zituen dozenaka lagun; arratsalde osoan Bergarari sostengua adieraztera joateko deialdia zabaldu zen Interneteko sare sozialetan, eta udaletxera bildu ziren hainbat. «Ez dugu familia gatazkatsurik nahi», aldarrikatu zuten.

Sestaoko herritar guztiak, baina, ez ziren alkatearen alde atera. Talde txiki bat udaletxearen aurrean jarri zen, Alkate arrazistak kanpora pankarta lelodun batekin. Bergararen aldekoek, baina, irainak eta oihuak egin zizkieten, «oportunistak» eta «Sestaotik kanpokoak» zirela esanez; tentsio une batzuen ostean, pankarta zeramatenek alde egin zuten.

Iluntzean, berriz, manifestazio bat egin zuten alkatea babestu zutenek Sestaoko kaleetan, «delinkuentziaren kontra». Aspalditik antolatuta zegoen mobilizazio hori.

Jaurlaritzak, kritikarik ez

Atzo goizean, BERRIAk informazioa kaleratu ostean, Eusko Jaurlaritzako ordezkariak izan ziren balorazioak egiten lehenak, kazetariek galdetuta. Harrituta azaldu zen Josu Erkoreka bozeramailea, eta Bergara «beste era batera» aritzen dela nabarmendu zuen: «Arazoei aurre egiteko eta pertsonekin erlazionatzeko beste estilo bat du».

Gizarte Politikako sailburuak, Juan Maria Aburtok, ez zuen erroldatzeko trabei buruz argibiderik eman nahi izan, esanez udalena dela eskumen hori. «Kasu zehatz hori ez dut ezagutzen». Halere, aitortu zuen herritarrentzat berebiziko garrantzia duela erroldan egoteak, baina, aldi berean, iradoki zuen batzuek iruzurra egiten dutela: «Badakigu erroldatuta egoteak aukera zabaltzen duela gure babes sisteman sartzeko, eta hori oso garrantzitsua da. Hori esanda, izan behar dute erroldatze efektiboak, ez faltsuak».

Aburtok «desegokitzat» jo zituen alkatearen hitzak, baina, dimisioa eman behar ote lukeen galdetuta, ez zuen argi erantzun: «Aztertu behar da. Esan behar dut, duda barik, Josu Bergara alkate ona dela, eta izugarrizko lana egiten ari dela egoera oso zailean». Bizkaiko Foru Aldundiko Berdintasun zuzendari ere izan zen Bergara.

EAJk, berriz, uko egin zion alkate eta alderdikidearen hitzen inguruko baloraziorik egiteari, nahiz eta galdetu zitzaion. Bergararen arratsaldeko adierazpenak bere egin zituen alderdiak.

%6

Espainiaz kanpoko etorkinak Sestaon.
Azken datuen arabera, Espainiaz kanpoko etorkinen kopurua inguruko herrien paretsuan dago Sestaon: %6 inguru dira atzerritarrak erroldan. 29.000 lagun eskas daude erroldatuta Sestaon, eta haietatik 1.900 inguru dira etorkinak.

EAJk gutxiengoa du udalean
Boto gehien jaso zuen alderdia izan zen hauteskundeetan EAJ, baina Sestaoko Udalean ez du gehiengorik. 4.563 boto atera zituen 2011n, PSE-EEk baino 500 gehiago. Hona udaleko banaketa:

• EAJ: zortzi zinegotzi.

• PSE-EE: zortzi zinegotzi.

• Bildu: hiru zinegotzi.

• PP: bi zinegotzi.

SOS Arrazakeriak erantzun du manipulaziorik ez dutela egin
Josu Bergara Sestaoko alkatearen agerraldiari erantzun dio SOS Arrazakeriak bart gauean. Nabarmendu du alkateak berak sortu duela arazoa, etorkinei trabak jarriz erroldan izena emateko. «Grabazioak erakusgarri dira, alkateak izan duen jarrerarenak. Hori da gai nagusia». Bergarak salatu du hedabideetan azaldutako grabazioak «manipulatuak» direla; ezetz esan du SOS Arrazakeriak, eta oso-osorik auzitegian daudela. Era horretan aritu behar ez izatea espero zuela azaldu du etorkinen eskubideen aldeko taldeak, baina beste modurik ez duela izan. «Zentzugabea da esatea Sestaoko alkatearen aurkako kanpaina dela, bai baitakigu horrelako argudioak erabiltzeak botoak eman diezazkiokeela».

ESANA. PATXI LOPEZ. PSE-EEKO IDAZKARI NAGUSIA

«Arrazakeria eta xenofobia dira kaka. Ezin du karguan egin denbora gehiago. Ez du balio barkamena eskatzeak»

ESANA. ANDER RODRIGUEZ. GIPUZKOAKO GIZARTE POLITIKAKO DIPUTATUA

«Alkateak irakurritako adierazpena betiko geratuko da euskal politikaren historia beltzenean»

Beste immigrazio politika bat ezinbesteko jo du EH Bilduk
Alkatearen adierazpenak salatu ditu EH Bilduk. Immigrazio politika ikusi du auziaren oinarrian. Sestaora iristen diren etorkin asko «miseria gorritik» ihesi doazela nabarmendu du koalizioak, eta hori bideratzeko beste eredu bat behar dela. Immigrazioa eta delinkuentzia era orokor batean lotzea salatu du EH Bilduk.

LABek salatu du Bergara «justifikatzen» saiatu direla
Josu Bergararen adierazpenak «onartezintzat» jo ditu LAB sindikatuak, eta hura kargutik kentzeko eskatu du. «Arrazismoaren eta xenofobiaren apologia egitea edozein kargu publiko kargugabetzeko adina arrazoi bada». Orobat, LABek salatu du EAJko kide batzuk «alkatearen jarrera justifikatzen» saiatu direla.