O perfil das mulleres prostituídas na Comunidade galega é, segundo indican os investigadores sociais, o dunha muller nova, pobre e inmigrante. As estadísticas sobre a procedencia destas mulleres así o confirman. E é que a maior parte delas proveñen de países como Brasil, Nigeria ou Colombia e chegan aos clubes galegos a través do aeroporto de Vigo e vía París, xeralmente con visado de turista ou incluso cun pasaporte falso en man. Asemade, as mulleres que exercen a prostitución nos clubes da Comunidade teñen entre 25 e 45 anos e están baixo o control de proxenetas que as captan nos seus países de orixe a través de familiares como tíos ou irmáns, baixo falsas ofertas de emprego. Unha vez no país de destino, as vítimas vénse obrigadas a asumir os costes derivados do seu traslado con altos intereses.