Eta jarraian, Aberasturin entzuten ditudan benetako elkarrizketen beste kronika bat:

-Badakizu zenbat abantaila dituzten txinatarrek…

-Txinatarrek?

-Bai, ba. Dendak zabaltzeko dirua ematen die.

-Nork baina? Administrazioak? Txinatarrei?

-Dirua ematen diete, eta gero, beraiek zer? Narkotrafikoa-edo egiteko erabiltzen dituzte lokalak. Mafia eta halako zikinkeriak. Hortik ateratzen dute dirua, zer uste duzu.

-Administraziotik ateratzen zutela uste nuen.

-Mafia kontuetan ibiltzen dira. Dirua zuritzen.

-Diru laguntza eta krimena, orduan. Hara.

-Sudamerikanoak ere antzera.

-Hegoamerikarrak, alegia.

-Horixe. Bat ezagutzen dut nik, etxe batean edo bitan dabil lanean, eta, hortaz aparte, gizarte laguntza kobratzen du.

-Seinale etxe horretan ez diotela gizarte segurantza ordaintzen. Bestela ezingo luke bestea kobratu.

-Bi edo hiru soldata irabazten! Bertokoak ezin duena!

-Egin, nahi baduzu. Bi lan, bat goizean, bestea arratsaldean…

-Badut nik lan sobera! Etxea gora eta behera, umeak… etxean daukadan neskatoak ere, molda gutxi.

-Txinatarra edo hegoamerikarra?

-Filipinetakoa-edo. Nik dakit ba. Horiek badakizu zertarako etortzen diren…

Irakurri duzuena benetako gertakizunetan oinarrituta dago. Ezingo nuke halakorik asmatu.