Nafarroako Gobernuak herrialde horretan bizi diren emakume afrikarren ahalduntzea bultzatu eta sustatuko du, Kairaba emakume afrikarren elkarteak egiten dituen jarduerak eta programak babestuz. Halaxe jasotzen du Nafarroako Gobernuko Migrazio Politiketako eta Justiziako kontseilari Eduardo Santosek eta Kairabako presidente Oumoul Khairatik astelehen honetan Nafarroako Jauregian sinatutako hitzarmenak.

Zehazki, Nafarroako Gobernuak ‘Dentaal’ programa babestu eta finantzatuko du. Peul-en, Mendebaldeko Afrikako hizkuntzetako batean, hitz horrek «elkarrekin parte hartzen dugu eta hazten gara» esan nahi du. Programa honen bidez, gizarteratzea, kultura arteko bizikidetza eta, batez ere, arrazakeriaren eta xenofobiaren aurkako borroka sustatu nahi dira.

Nafarroan bizi diren Afrikako hainbat herrialdetako emakumeek garatu duten programa honek migratzaileek dituzten oztopo ugariei buruzko sentsibilizazioa zabaldu nahi du, Nafarroan benetako bizikidetza lortzeko lan egitearen alde.

Emakumeen generoaren eta kulturartekotasunaren ikuspegitik pentsatutako programa da. Egingo dituen jardueren artean, besteak beste, «Africa en Femenino» irakurketa kluba eta «emakumea eta lidergoa»ri buruzko jardunaldiak antolatuko ditu.

Era berean, administrazio publikoetako eta eremu pribatuko profesionalei zuzendutako Afrikako biztanleen kulturaren gakoei buruzko prestakuntza ikastaro bat antolatzea ere finantzatuko du Gobernuak, eremu publiko eta pribatuetan populazio horri ematen zaion arreta hobetzeko.