Hego Euskal Herriko hiriburuetan manifestazioak deitu dituzte hainbat elkarte eta kolektibok, babes bila migratzen duten pertsonen egoera azaleratu eta erantzun sendo baten beharra aldarrikatzeko.

Babes bila migratzen duten pertsonen krisiak urrats bat gehiago eman du Turkiak mugak ireki eta Grezian, bai Poliziak bai eskuin muturreko taldeek, erantzun bortitza eman eta gero. Egoera honen aurrean, hainbat kolektibok mobilizazioak deitu dituzte Iruñea, Bilbo, Donostia eta Gasteizen larunbat eta iganderako.

«Ikusten ari garen errealitateak, bai Grezia, Balkanak, Turkia edo Ceuta edo Melillako mugetan, bai Libian babes bila dabiltzan pertsonek bizi duten errealitateak, edo Greziako errefuxiatuen esparruetan, gure ikuspuntutik, premiaz eskatzen digu egoera horren aurrean erantzun sendoa ematea», adierazi dute.

Ongi Etorri Errefuxiatuak (Araba, Gipuzkoa eta Bizkaia), Iruñea Harrera Hiria, Euskal Herriko Mugak Zabalduz Karabana, Nafarroako SOS Arrazakeria eta Paperak Denontzat ekimenetatik, egoera honi erantzuteko manifestazioak antolatu dituzte.

Bilbon, martxoaren 14an, 18:00etan Eliptika enparantzatik abiatuko da manifestazioa. Egun eta ordu berean, Iruñean Autobus geltokian eta Donostian Boulebarrean dira hitzorduak. Gasteizen, aldiz, igandean 13:00ean elkartuko dira Artiumen.

Hainbat erakunde sozial, sindikatu eta alderdi politikoekin elkartu dira atxikimendua eskatzeko eta datozen egunetan emanen dute zerrenda honen berri.