Lo inmaterial tamién ye cultural

La Voz de Galicia, XUAN PORTA , 14-06-2019

Europa ye un continente pequeñu y mui diversu, que tien valores que nun son compartíos por toos pesie a caltener un fondu común. Los inmigrantes, añedieron pieces a esti mosaicu cultural. Los valores europeos son heriedu de la Illustración. Sofítense na racionalidá, la ciencia y el progresu que surdieron de los filósofos del sieglu XVIII. La xente entamó a creyese responsable del so propiu futuru. Amás, Europa foi dominada poles versiones de la relixón xudeo-cristiana y les sos guerres que dexaron llugar a la secularización. Les festividaes son testigu d’ello. Tamién surdió equí’l desendolcu de los Estaos nacionales y el conceutu de ciudadanía, colos sos drechos y obligaciones pa ser un bon ciudadanu. La cultura hestórica destacó un principiu de xerarquía, de fondos raigaños feudales y aristocráticos que derivó nun sistema de clases. Too ello forxó una cultura estremada de la d’otros continentes. Ye la fonte de los drechos humanos, incluyíos los drechos llingüísticos. Los humanos facemos la cultura sofitándonos en símbolos venceyando significaos a oxetos y aiciones. El llinguaxe ye’l sistema simbólicu qu’usa una xeneración pa tresmitir la so cultura a la viniente. Nesi sen, el multiculturalismu promovíu pola Xunión Europea representa los esfuercios educativos por meyorar la conocencia y el valir de la diversidá cultural. Dientro la cultura, hai elementos del patrimoniu de calter material y otros, como la llingua, que ye un patrimoniu de calter inmaterial.Poro, anque n’Europa se fala’l 3% de los idiomes del mundiu, hai 50 llingües en pelligru de desaniciu, ente elles l’asturiana. La Xunión Europea, tien 24 llingües oficiales Y otres 60 (cooficiales o non) nomaes minoritaries. Éstes tienen al so favor la Carta Europea de les Llingües Rexonales o Minoritaries. Nesi sen, l’asturianu, pesie a tar reconocíu nel artículu 4u del Estatutu d’Autonomía d’Asturies, ye una llingua minorizada que les normes europees insten a la so normalización y oficialidá. Asturies siguirá meyor la llinia europea de proteición de los drechos llingüísticos si asume la necesidá d’asitiar l’asturianu na categoría llegal que tienen les otres llingües non castellanes d’España: la oficialidá. Ye un drechu de la nuesa comunidá llingüística a la reconocencia igualitaria ente les llingües y cultures d’Europa que permita’l desendolcu normal de l’usu públicu del asturianu como cualesquier llingua non subordinada. Ye un drechu non solo nel Día d’Asturies.

Texto en la fuente original
(Puede haber caducado)