Migratzaileak hartu dituzte azken hilabeteetan Irungo Lakaxita gaztetxean (Gipuzkoa); hala ere, han egon diren boluntarioek ohartarazi dutenez, datorren udazkenari eta neguari begira «aterpetxe inprobisatuak» ez ditu gutxieneko baldintzak betetzen, eta ez dago prestatua «harrera duina» egiteko. Horiek hala, arduraz jokatzeko eskatu diete erakundeei, eta, batez ere, Irungo Udalari. Presio egteko, erabaki dute Lakaxitako gunea desmuntatzea eta Irungo Udalaren Gizarte Ongizate Sailaren egoitza parera lekualdatzea, Urdanibia plazara.

Harrera Sareko (IHS) kideak, migranteek eta herritarrek lagunduta, 18:00etan hasi ziren egoitza berria muntatzen, eta han pasatu dute gaua. Udalari neurriak hartzeko eta ekarpenak egiteko eskatu diote, eta ohartarazi dute han egongo direla aurrerapausoak egin bitartean.

IHSko kideek proposamen bat egin diote udalari. Orain arte Martindozenea aterpetxean hartu dute ostatu zenbait migratzailek, baina baldintza jakin batzuk betetzen zituztenak soilik —besteak beste, ezin dute bost egun baino gehiago egon—. IHSko kideen ustez, leku egokia izan daiteke arreta integrala emateko, baina udalak erantzun die baldintzak betetzen ez dituztenak ezin direla han egon. Hala ere, beste 24 toki eskaini ditu ospitale zaharreko egoitzan, Urdanibia plazan; migratzaileek han pasatu ahalko dute gaua eta jasoko dute jana, baina egunez ezin izango dute han egon. IHSko kideentzat ez da aski, eta baliabide gehiago eskatu dituzte.

Jaurlaritza, Bruselan

Marian Elorza Eusko Jaurlaritzaren Kanpo Harremanetarako idazkari nagusia, berriz, Europako Batasuneko Europako Eskualdeen Batzordean izan zen atzo, eta proposatu zuen migratzaileak hartzeko eta gizarteratzeko politikak adostea lurralde bakoitzaren sarrera fiskalak, biztanleria eta langabezia indizeak kontuan hartuta. Horren arabera, aurrenekoari %50eko garrantzia eman beharko litzaioke, bigarrenari %30ekoa, eta hirugarrenari %20koa.