DONOSTIA – Kalean pobrezia egoeran bizi diren eta ostatu hartzeko etxerik ez duten pertsonentzako laguntzak eskatu zituzten atzo Donostian antolatutako elkarretaratzean parte hartu zutenek. Erakundeei “baliabide gehiago” eskatu zizkieten, dozenaka gizarte taldek, alderdi politikok eta sindikatuk deitutako mobilizazioaren bidez.

Gipuzkoa plazan egin zuten protesta atzo eguerdian, Foru Aldundiaren jauregiaren aurrean, hainbat pankartarekin: Ez utzi inor kalean, Etxe bat izatea eskubidea da, egia bihur dezagun eta Gizarte justuago baten alde, zioten, besteak beste. Parte-hartzaile askok gaur egun Donostian bizi diren ehun lagunen izenak, adina eta nazionalitatea zituzten kartelak zeramatzaten.

Elkarretaratzean, Donostiako Harrera Sareko boluntarioek agiri bat irakurri zuten, “gizarte honek bizitza duina nahi duten ehunka pertsona babesik gabe ezin dituela utzi” salatzeko. “Ahalegina egin behar dugu, gizarte osoak, giza duintasunarekin bat datorren gutxieneko bat izan dezaten”, azpimarratu zuen Garazi Montuschik, gaztelaniazko testua irakurtzeaz arduratu zenak.

“Sabaia, beroa, janaria eta higienea, norberaren proiektuen arabera urratsak emateko gutxieneko abiapuntua dira. Bazterkerian erortzea saihesteko. Gure gizartean bere lekua aurkitzeko”, azpimarratu zuen Montuschik. “Ez ditzagun ikusezin bihurtu. Bakoitza bere lekutik. Erakundeak, beharrezko baliabideak jarriz. Herritarrak, harreran inplikatuz. Laguntza materiala eta giza beroa eskainiz. Gure esku dago”, gaineratu zuen bozeramaileak.

“Etxegabetasun egoeran jende asko dago oraindik” eta “oinarrizko beharrak (arropa, janaria eta babesa) betetzea falta da”, azaldu zuen elkarretaratzearen amaieran, kazetariei egindako adierazpenetan. Herritarrek pertsona horiei ematen dizkieten laguntzez gain, udalek, aldundiek eta Eusko Jaurlaritzak “askoz baliabide gehiago” jarri behar dituztela haien esku aldarrikatu zuen.

Horren harira, gogorarazi zuen Donostian hotzaren aterpea “tenperatura bost gradutik jaitsi denean bakarrik” ireki dela, eta, ondorioz, azpiegitura horren irekiera (etxerik gabekoentzat beste baliabideak baldin badaude ere) “termometroaren” araberakoa ez izatea eskatu zuen, “negua oso gogorra delako”.

AD
Parte-hartzaile askok gaur egun Donostian bizi diren ehun lagunen izenak, adina eta nazionalitatea zituzten kartelak zeramatzaten